اصطبحنا واصطبح الملك لله
الصبح وانت رايح على شغلك
وهى نايمة تعمد توقع أي شيء أو
أخبط الباب بصوت عالي علشان تصحيها هي كمان
اشمعنى انت يعني؟ ولو حاولت ترجع تنام تانى قلها
مادام صحيتى حضري لي الفطار بقى يا حبيبتي
(أنا اللي شاريه وأنا اللي أولى بيه )
إذا كنت بتتفرج على التلفزيون وهى عايزة تغير القناة
قلها معلش الحلقة دى مهمة جدا واحد صحبى شافها على القناة الفضائية وقالى إن الحلقة دى بالمسلسل كله
ولو كنت بتتفرج على ماتش كورة هيبقى الموضوع اسهل
كل ما حد من اللاعبين من أي فريق يمسك الكورة قلها معلش ثوانى بقى
أنا حاسس إن الكورة دى جول حتى لو كان حارس المرمى ماسك الكورة والماتش واقف لان فيه واحد مصاب.....
(ملاحظة : (ده بالنسبه للستات الي مش عندهم خبرة في الكورة). من الآخر كدة مش انتا اللي شاري التليفزيون ده ودافع فيه دم قلبك،
يبقى من حقك بقى بعد كدة إنك تتفرج على اللي انت عايزه في الوقت اللي انت عايزه...
حتى لو أبوها هو اللي جايب التليفزيون، وإيه يعني مش يحمدوا ربنا إني اتجوزت بنتهم وكان عندي شقة...
وبعدين لو جبت راجل في البيت يعني الكلمة كلمتك والشورة شورتك وكلامك لازم يمشي... ولا إيه؟
(والنبي بلاش المطبخ اهئ اهوء اهااااااااااا )
اصحى يوم الجمعة بهمة ونشاط وجهز الفطار لمراتك بس متنساش انك تستخدم 15 طبق
واكبر كمية من المعالق والشوك و 5 حلل بمقاسات مختلفة
و 10 كوبيات علشان تعمل طبق بيض وسندويتش جبنة
وطبعا يراعى ترك آثار سمنة على الأرض مع ترك التلاجة مفتوحة وقشر البيض في الحوض
كدة عمرها ما هتطلب منك تجيبلها حتى ولا كوباية ميه
هي هتجيبلك كل حاجة وهتعمللك كل حاجة
حتى من غير ما انت تتطلب.. وادعيلي بقى يا سي السيد
(كل سنة وانتي طيبة يا حياتي )
عيد ميلادها ظبطلها تورتة عيد ميلادها بخمسين شمعة
ولو سألتك لية خمسين رغم ان عندها 20 سنة بس؟
اتحجج ان الاضائة ضعيفة في البيت وانت بتبص على النجفة اللى عندكم اللى
فيها 30 لمبة مع ابتسامة صفراء خفيفة.
بعد كدة عمرها ما هتلومك لو نسيت عيد ميلادها
بالعكس دي هتحمد ربنا
ويا سلام بقى لو عملتلها حفلة لعيد ميلادها وعزمت كام واحد من صحابك اللي هي موش بتحبهم
يا سلاااااااام.. جوووووول.. حيبقى آخر حفلة عيد ميلاد ليها
كل أعياد الميلاد اللي جاية بعد كدة هتبقى سكيتيييييي( ملحوظة اول ما الضيوف يمشو اخلع انتا يا معلم )
(هو ده بقى العذاب الحقيقي )
لو عاملة ريجيم اجرى على السوبر ماركت ومحلات الحلويات
واملى التلاجة شكولاتة وحلويات وجاتوهات
يرعى التجول في المنزل وانت مستمتع بأكل الجاتوة أمامها
ولو حاولت مجرد محاولة إنها تشم حتى الحلويات بتاعتك أو تمد إيدها عليها،
قولها في منتهى الرقة والهدوء.. مرات صاحبي (شيماء)
محافظة على جسمها ورشاقتها جداًً.. والله برافو عليها
عمرها بعد كدة ما هتفكر تمد إيدها على حاجة حلوة
ومش بعيد كمان تحبس نفسها في الأوضه أول مانت تشتري حاجة حلوة
(حلوة أوي الملوخية دي يا روحي)
متنساش رأيك فى طبيخها لو عاملة لحمة قولها حلوة اوووى الفراخ دى
ولو طابخة بامية . جميلة اوى الملوخية دى حطيتي عليها اية ؟؟
ولو عملة كيكة قلها انا بحب اشرب شاى مع البسكويت الحلو دة
ولعلمك دي أكتر حاجة بتخنق الستات
لأن المطبخ والطبيخ حاجة حيوية في حياة المرأة
فلو قولتلها كدة... هتحبس دمها.
(فستانك الجديد وقع تحت )
لو طلبت منك تنشر الهدوم قولها حاضر مع ابتسامة رومانسية
وبعد ما تخلص نشر الهدوم ادخل عليها وقولها أنا نازل أجيب الهدوم اللى وقعت منى فى الشارع
ولو سألتك هو اية اللى وقع؟ حاول تذكرلها تلت تربع هدومها اللى كانت مغسولة
مع فردة شراب من بتوعك علشان متبقاش مقصودة منك!
ويا سلام لو الأرض تحت فيها طينة!!!
تخيل بقى إنها هتضطر تغسل كل الهدوم دي تاني
كدة طبعاً عمرها ما هتقولك انشرلي الغسيل تاني وهاترتاح من الشغلانة دي طول العمر.
(ارفع رجليك عشان امسح )
لو الزوجة قررت مسح الأرضيات في البيت
حاول انك تروح وتيجى على المناطق المبلولة متحجج بأنك محتاج بتدو على حاجه مهمة ضايعه
ومرة عطشان ومرة تانية بتجيب الجرنال ومفيش مانع انك تقول انك حاسس إن التليفون هيرن كمان شوية
بس ماتزودهاش أوي لحسن ممكن تفقد أعصابها وتلاقي نفسك مستحمي بجردل مية المسح...
(عالم مواعين مواعين)
لو كانت مشغولة في نظافة البيت أو مع الأولاد
وطلبت منك تغسل كوبيتين الشاى بتوع الصبح الموجودين في الحوض
ارجعلها كمان دقيقة من دخولك المطبخ
وانت ماسك كوباية من الاثنين وهى مكسورة واسألها بهدوء وبرائة أرمى دى فين يا قلبي ؟؟
ويا سلام بقى لو الكوباية دي من الطقم الصيني اللي بالشئ الفلاني اللي مامتها اشترتهولها للجهاز
بس حاسب لحسن الموضوع يتطور وتحدفك ببقية الطقم وتروح بلاش ياغلبان
تبقي شهيد الصيني والمواعين
(آآآآآه يا ضهري)
وأنت قاعد تتفرج على التلفزيون وهى طالع عينها في تنظيف البيت
وبعد ما تخلص وتيجى يدوبكك تقعد تستريح جنبك
بصلها بنظرة تعب وقلها حبيبتى معلش ممكن كوباية مية علشان ضهرى بيوجعنى
وبكده نكون خلصنا الدرس
ملحوظة :- اي واحد متجوز واحده عقلها على قدها ينسى الي انا قلته لحسن ننساه احنا من اول تجربة
الجمعة أكتوبر 08, 2010 3:37 pm