طريقك لتكون مصمم مواقع محترف - الجزء الأول

السلام عليكم ورحمة الله وبركاتة


مرحباً بكم إخواني وأخواتي الكرام

أنا عايز أوضح بس إن دي مش
دورة لكن هي هتكون عبارة عن حلقات والهدف منها إننا كلنا هندردش إزاي نبتدي الطريق دا وإزاي أتعلم ومشي فيه وبقا
مصمم مواقع

ومش بس كدا لا أحنا عايزين
كمان أي حد عندة سؤال يكتبة وباذن الله نرد عليه ونحاول نساعد عشان لإنوا مجال ممتع فعلاً سواء التصميم او
التطوير

نبدأ بسم الله

كيف تصبح مصمم مواقع

أول حاجة لازم نعرفها يعني أيه مصمم مواقع ؟

مصمم المواقع هو الشخص القادر علي تصميم موقع بلغات أو بأدوات التصميم
المختلفة ,يعني هيجيلك عميل هيقولك انا دلوقتي عايز أصمم موقع شخصي أقدر من
خلالة أعرف الناس بخبراتي وكمان من خلالة أقدر أستقطب شريحة معينة
للتعامل معايا

كل إلي هتعملة إنك هتفهم المطلوب من العميل كويس وهتبدأ تقعد مع نفسك وتفكر
في شكل الموقع وفي عدد الصفحات وفي كل حاجة مطلوبة بشكل مبدئي ,بعد كدا
هتفكر إزاي هتنفذ دا بشكل فعلي وأي الأدوات هتستخدمها عشان تخرج الموقع دا
للنور

هتقول مثلاً أنا هستخدم في التصميم برنامج الفوتوشوب ,وهستخدم كمحرر برنامج
الفرونت بيج أو الدريم ويفر وهستخدم لغات البرمجة لغة الهتمل HTML والـ
CSS

مش عايزين نقول ايه الحاجات دي ,كل الحاجات دي هنعرفها بعدين واحدة واحدة
,المهم دلوقتي عرفنا إننا فكرنا إزاي هنعمل الموقع عشان يطلع للنور وبالشكل
دا نقدر نبدأ في تصميم فكرة ولو معجبتناش نصمم تاني ونعيد ونزيد لحد
منخرج بشكل تصميم محترم يناسب مستوانا وطلب العميل

هيجي عميل تاني هيقول أنا صاحب معرض سيارات ,أنا
محتاج الزائر يدخل يلاقي قسمين سيارات جديدة وقسم سيارات مستعملة ,ولما
يضغط علي أي قسم منهم يظهرلة كل الفئات وهتبقا فيه ترتيب كمثال السيارات
أقل من 100.000 دي فئة والسيارات أقل من 50.000 دي فئة وهكذا ..

ويبقا فيه جزء تاني لإختيار فئات السيارات بالترتيب التالي (سيارات فيات -
هوندا - بي ام دابليو - مرسيدس - تيوتا - سبرانزا - لانسر) وهكذا ..

كمان عايز الزائر يقدر يضيف تعليق ويبعتلي رسالة بطلب شراء السيارة

وكمان أنا أقدر أضيف بسهولة كل يوم موديل سيارة جديد سواء في قسم السيارات الجديدة أو قسم المستعمل وفي الفئة بتاعتها

أيه دا أنا توهت

لا براحة هنرد علي العميل هنقولة أحنا بنصمم بس لكن من خلال خبرتنا علي
الويب فيه أكثر من سكربت (برمجة جاهزة) موجودة ممكن من خلالها نعمل الموقع
إلي أنت عايزة

وهتعرض علي العميل أمثلة من البرمجيات دي

أفرض عجبتة ؟ : هنا هتبدأ تفهم فكرة البرمجة دي وتصميمها ماشي إزاي وهتعمل
تصميم جديد علي البرمجة سواء كانت بالـ CSS أو بأي شكل كان

أفرض مفيش برمجة عجبتة ؟ : هنا هنقولة الموضوع كدا محتاج برمجة خاصة ولو
أنت ليك معارف يخلصوا الموضوع دا هتكلمهم ولو متعرفش هتقولة إنك بتصمم بس
حالياً وهو عليه يعمل البرمجة وأنت مستعد تصممهالة (وبالتأكيد العميل هيطفش
ومش هيجيلك تاني)

طيب خلونا نرجع ونقول أنا قولت الكلام دا كلوا ليه ؟

عشان أعرفك أيه الفرق بين لما يجيلك عميل وهتقدر تعمل شغلة ولما هيجيلك
عميل تاني ولازم تدور علي حل عشان تعملة شغلة ,أنا عارف ومتأكد إن الأرزاق
بيد الله ,لكن ليه متعملش شغل الإتنين ,أنت كمصمم مواقع لازم تعمل شغلك
وتطور نفسك بحيث مترفضش الأعمال إلا في حالة إنها كانت غير مناسبة (تصميم
موقع أغاني مثلاً) أو إن كنت مش فاضي وحتي دي بردوا المفروض متبقاش حالة
تخسر فيها عميل ,ممكن جداً تتفق مع زميل ليك إنك لما تكون مشغول هو يعملك
الشغل بإسمك وياخد نسبة (صرف نفسك بأي شكل)

أنا بقول الكلام دا ليه ؟


بقول الكلام دا عشان ناس كتيرة بتتكلم في موضوع التصميم دا شباب كتير لسه في
بداية الطريق ,الطريق إلي عايز تعب وإجتهاد وعايز منضيعش فرص ونفكر إزاي
ناخد خطوة حقيقية عشان نتعلم مهنة ممكن تكون بداية كويسة لينا ونقدر نعيش في مستوي كويس

بعدنا عن الموضوع معلش اصل اى شاب هيلاقي
نفسة قدام طريق من الإتنين يا واسطة الشغل ودي مكانتش موجودة ,يا إما
الإعتماد علي الله ثم النفس ودا الطريق التمام


المهم عشان مطولش عليكم في الحلقة دي خلونا نبدأ نقول أيه هي أدوات التصميم
بعد كدا هنتكلم وهنقول أيه هي المصطلحات إلي ممكن تقابلك عشان تبقا
عارفها


أي مصمم في الدنيا عايز يبدأ تصميم سواء جرافيك أو ويب أو دعايا أو أي حاجة
ممكن تتخيلها لازم يعدي علي برنامج الفوتوشوب لإنوا الأساس زي مبيقولوا

يعني مصمم الدعايا بيحتاج الفوتوشوب والإليستريتور
مصمم الجرافيك بيحتاج مثلاً الفوتوشوب والثري دي ماكس أو المايا

نفهم من كدا إن الأساس بتاعنا هو الفوتوشوب ,وللناس إلي مشتغلتش عليه عايز
أقولكم برنامج الفوتوشوب تقدر تعمل بيه أي حاجة ,زي الصلصال تشكلة زي منتا
عايز لحسابك

إصدارات الفوتوشوب دائماً ميبقاش فيها إختلاف كلي ,لكن بين كل إصدار وإصدار شوية مميزات بسيطة وأنا بفضل الفوتوشوب CS3


يبقا زي مقولنا لازم أول حاجة نتعلمها هي الفوتوشوب كأساس
للتصميم وأنا في أخر الموضوع هنزل شوية كورسات ملخصة فيها المفيد لتعليم
الفوتوشوب ,بعد كدا هنبتدي نشوف برنامج لتحرير المواقع وأشهر البرامج
المستخدمة هما الدريم ويفر أو الفرونت بيج ,لكن عشان أكون واضحة الدريم
ويفر طبعاً أفضل مليون مرة من الفرونت بيج


وعشان الموضوع دا يبقا أوضح ,الأفضل لو هتصمم موقع إنجليزي أو موقع ديناميكي إستخدم الدريم ويفر

لو هتصمم موقع عربي أو إستايل لمنتدي فالفرونت بيج هيقوم بالواجب وزيادة ومش هتقابل منه أي مشاكل

لتحميل الفرونت بيج 2003

http://www.klamaraby.com/vb/showthread.php?t=17844

لتحميل الدريم ويفر CS4

http://www.klamaraby.com/vb/showthread.php?t=35407

نيجي للجزئية الأخيرة وهي برنامج الفلاش ,ودا طبعاً عشان نعمل بيه قوائم
متحركة أو عشان نعمل بيه صورة يكون ليها تأثيرات خاصة أو أي إستخدامات أخري
مطلوبة والفلاش يعتبر برنامج كبير جداً وطويل في تعليمية (لأن الفلاش
ينقسم لتعليم قوائم البرنامج نفسها وجزئية تانية برمجية وهي الأكشن سكربت)
فالأفضل إنك حتي علي الأقل تتعلم تستخدم الفلاش بشكل كويس ويكون مستواك
فيه متوسط ,يعني مش ضروري أوي تكون محترف فيه ودا كبداية لإنك بعد كدا لما
هتحتاج تعمل مؤثرات في أعمالك بشكل خاص هتضطر تكون عارف البرنامج دا كويس

لتحميل برنامج الفلاش CS4

http://www.klamaraby.com/vb/showthread.php?t=35409

كدا عشان أقول علي نفسي إني مصمم مواقع لازم أبقي عارف فوتوشوب بشكل عام
كويس ,وأبقي عارف الدريم ويفر والفرونت بيج بشكل مقبول ,والفلاش بشكل متوسط
,كدا أحنا فهمنا هنستخدم برامج أيه في شغلنا عشان نقدر نصمم أي موقع

ندخل بقا علي الجزئية التانية وهي (التكويد)

دلوقتي أي برنامج محرر هتلاقية بيكتب أكواد الـ HTML بدل منك يعني مش لازم
تكون عارف الهتمل كويس ,لكن أنت كمصمم لازم تبقا عارف ايه إلي مكتوب في
الصفحة عشان لو أضطريت تعدل علي كود بإيدك في أي وقت تبقا فاهم مش حافظ

وعشان تتعلم الـ HTML من البداية للنهاية هياخد منك الموضوع مجرد 3 - 4 ساعات كدا وأنت بتشرب شوية شاي تكون مخلصة

خلي بالك إحنا عايزين نفهم الهتمل مش نحفظة ,مش مطلوب تكون محترف يعني ,لا المطلوب بس يكون عندك نبذة كويسة عن أكوادة

بعد متخلص تعليم الهتمل لازم دلوقتي تبدأ في تعلم مباديء الجافا سكربت ودي
لإن معظم المواقع دلوقتي أصبحت ديناميكية ولغة الجافا تؤدي هذا الدور
,فأنت حتي مطلوب منك في البداية أنك تفهم نبذة كويسة عن الجافا بحيث تقدر
تعدل علي الأكواد الجاهزة وبعد كدا مع نفسك واحدة واحدة طور نفسك في
الجافا

بعد متخلص تعلم مباديء الجافا هتحتاج دلوقتي تتعلم مباديء الـ PHP بردوا
ودا لإن هيقابلك برمجيات كتير هتحتاج من خلالها تعدل علي أكواد بي اتش بي
فلازم تبقا فاهم أنت بتعدل علي كود بيعمل أيه أو تعدل عليه إزاي أصلاً
,فالمطلوب ليس إحتراف الـ PHP مع إن إحترافة شيء كويس في صالحك لكن المطلوب
تعلم مباديء لغة برمجة الـ PHP وهي لغة هامة جداً وأصبح يعتمد عليها الأن
في بناء وبرمجة معظم المواقع الديناميكية الجديدة

خلاص أتعلمنا مباديء (هتمل وجافا وبي اتش بي) ,دلوقتي بقا يا جميل أنت
ناقصك تتعلم الـ CSS بل تحاول أن تحترف الـ CSS وهل لغة جميلة وبسيطة وهي
خاصة بالتحكم في شكل الصفحات من الناحية الجمالية (الألوان - النصوص -
الروابط - شكل وتنسيق الصفحة) ,وبالنسبة لوقت تعلم السي اس اس لن يستغرق
سوي يومان أو ثلاث أيام متواصلة

نعيد تاني يا شباب ؟

مطلوب مباديء (أو إحتراف) الهتمل لإنها أصلاً لغة بسيطة في تعلمها
مطلوب تعلم مباديء الجافا
مطلوب تعلم مباديء البي اتش بي
مطلوب إحتراف الـ css

دلوقتي نقدر نقول بعد منتا أتعلمت الحاجات
دي كلها إنك عندك مقومات مصمم المواقع الحقيقي ,لكن هينقصك شيء واحد وهو
التدريب الكتيييييييييييييييييييييييير

دمتم بحفظ الله ورعايتة

الجزء التانى قريبا


اختكم SAMA